خالي من الجلوتين السلياك وحساسية القمح فى مصر Celiac gluten free Egypt
أهلا وسهلا! سعداء جدا بزيارتك!

انضم إلى المنتدى ، فالأمر سريع وسهل

خالي من الجلوتين السلياك وحساسية القمح فى مصر Celiac gluten free Egypt
أهلا وسهلا! سعداء جدا بزيارتك!
خالي من الجلوتين السلياك وحساسية القمح فى مصر Celiac gluten free Egypt
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

اذهب الى الأسفل
وردشان
وردشان
Admin
Admin
عدد المساهمات : 206
تاريخ التسجيل : 15/05/2011
https://gluten-free.forumegypt.net

دليل متكامل لاروع و أسهل اكلات ملوكة  Empty دليل متكامل لاروع و أسهل اكلات ملوكة

الخميس 21 يونيو 2012, 22:27


نقلا عن حبيبتى ملوكة ..مفيد للغاية ..بارك الله فيك يا ملوكة:


حبيباتي الوصفات دي كلها غير منقولة
وكلها من مقاديري وانا اللي عاملاها بايدي ويارب تعجبكم


وصفاتي في الحلو
********************************************

كاسات المانجو

المقادير
بجيب شرائح مانجو امريكانا المجمدة واخد نصف الكيس حوالي نصف كيلو
باكو كريم شانتيه
علبة قشطة
ظرفين جيلاتين

بسكوت سادة خالى من الجلوتين
قطعة زبدة
قطع مانجو
كريمة للتزيين

الطريقة
في نصف كوب ماء بارد اضرب كيس الكريم شانتيه والسكر واضيف عليهم شرائح المانجو واضربهم كويس

افرغهم في حاجةغويطة واحط عليهم علبة القشطة واكون دوبت كيسن الجيلاتين في شوية مية سخنة واضيفهم
اضرب كله بلمضرب السلك

اجيب البسكوت واطحنه في الكبة مع الزبدة

اجيب الكاسات واحط طبقة من البسكوت واضغطها واصب عليها الخليط السابق

احطها في التلاجة لحد ما تجمد
ومش بتكون جامدة اوي
وقت التقديم ازينها بالكريمة وشرائح المانجو


********************************************
حلا كريم الكراميل بالكاكاو
المقادير
2كوب حليب
علبة كريم كراميل
ملعقة كبيرة نسكافيه
علبة قشطة
باكو بسكوت سادة خالى من الجلوتين
زبدة


الطريقة
احط الحليب على النار واضيف باكو الكريم كراميل
وبعد ما يخلص اطفي عليه النار واضيف النسكافيه والقشطة واضربهم كويس

اضرب البسكوت والزبدة في الكبة
افرغهم في صينية مستطيلة واكبس البسكوت كويس واصب عليه الكريم كراميل

ادخله التلاجة وبعد ما يجمد ارش على الوش طبقة سخية من الكاكاو واقطعه مكعبات صغيرة واحط كل مكعب في ورق بليسية وارصه في صينية تقديم كبيرة
طعمه حلو وشكله احلى


********************************************
هريسة الذرة بالبرتقال
المقادير

3 كوب دقيق ذرة
1ونصف كوب سكر
3 ملاعق صغيرة بيكنج بودر
ملعقة صغيرةفانيليا
5 بيضات
بشربرتقال
كوب سمن
من نصف الى كوب عصيربرتقال ( حسب الحاجة )

الطريقة
يضرب السمن مع السكر حتى يتغير لونه ثم يضاف البيض والفانيليا وبشرالبرتقال
يضاف الدقيق بعد خلطهم واضافة البيكنج بودر بالتبادل مع عصيرالبرتقال
تدهن صينيةالفرن ويصب فيها العجين ويخبز بالفرن

وبالهناوالشفا


********************************************

المهلبية بالكراميل

المقادير
2 كوب حليب
3 ملاعق كبيرة ممسوحة نشا
4 ملاعق كبيرة سكر
فانليا
كراميل ( او سكر محروق )

الطريقة
بنعمل المهلبية الطريقة العادية
نغلي اللبن والسكر ولما يبدا يغلي نضيف الفانيليا ونكون حلينا النشاء بشوية ماء ونصبهم على الخليط والتقليب المستمر على النار الهادئة الىان يغلظ قوامه ونطفئ النار

نعمل الكراميل بحرق السكر على النار او لو عندك كراميل جاهز
نجيب قارب فخار اوبيركس ونحط فيه الكراميل ونصب فوقه المهلبية وممكن نرش شوية كراميل على الوش و ندخلها الفرن نص ساعة
تؤكل دافئة او حسب الرغبة
وبالهنا والشفا


********************************************

الكسكسي

المقادير
كيلودقيق خالى من الجلوتين
من كوب الى كوب ونصف ماء بارد حسب الدقيق
نص معلق ملح

الطريقة

في طبق كبير وعميق نحط الدقيق
اخلطي الملح مع الماء البارد

قومي رش كمية صغيرةجدا من الماء على الدقيق وقومي بفركها الى ان تختفي ثم رشي كمية اخرى وافركي الى ان تختفي وهكذا الى ان يختفي كل بودرة الدقيق وتحصلي على كرات صغيرة جدا ( شبه الكسكسي )

وخلي بالك انك ماتزوديش الماء عشان ما يبقاش عجينة

بعدين خدي المقدار ده شوية شوية اضربيه في الكبة عشان تحصلي على الكرات الدقيقة للكسكسي

افركيه كويس باديكي وعدين هاتي قطعة قماش كبيرة بيضاء وحطي فيها كل الكسكسى ولو عندك حلة بخار حطيهم فيها او تجيبي حلة تحطي فيها ماء وفوقها مصفاةوحطي القماش بالكسكسي وغطيهم كويس وسبيهم جوالى ساعة مع التقليب من الحين للأخر الىان تختفي رائحة الدقيق نهائيا

بعد كده تخدي الكمية اللي انتي عايزاها وهي سخنة وحطي عليها معلقةسمنة وقلبيها لحد ما تسيح وبعدين حطيها في طبق ورشي عليها السكر والزبيب والمكسرات حسب الرغبة

طبعا غير الطريقة المعتادة مع السكر والزبيب والمكسرات
ممكن ناكله مع الخضار طعمه راااااااااااااااااااائع

طريقة الخضار
يخمر بصلتين مبشورتين مع السمن ويضاف اليهم قطع اللحم الى ان تذبل اللحم
يضاف عصير الطماطم ويترك الى ان يستوي اللحم نصف سوى
تضاف الخضار( كوسة وجزر وبطاطس مقطعة مكعبات كبيرة جدا ) والملح والفلفل الاسود ولو احتاج الامر عصير طماطم ويترك حتى تمتم النضج

يوضع الكسكسي في سرفيس ويرص حوله الخضار واللحم


الطريقة الثانية
مع الكبد والكلاوي
بتشويحها في السمن مع فصين توم وملح وفلف ويزاد شوية ماء حتى النضج
وبالهنا والشفا


********************************************


الارز باللبن بالفواكه

المقادير

ربع كوب ارزمصري
لترحليب
نص ملعقة فانيليا
1 ونص كوب سكر
ثلاثة ارباع كوب نشا
2 كوب ماء
علبة قشطة
فصين مستكة مطحونين

للتزيين
فواكه ( موز / رمان / فراولة / تفاح ) او المتوفرلديك
قشطة
عسل


الطريقة

نضع كوبين الماءوالارز على نار هادئة الى ان يستوي الرز ( يتهري )

نضيف الحليب والسكر والقشطة ونعلي النار شوية ونتركهم الى ان يغلي ونهدي النار ونضيف المستكة ولا نضيف الفانليا الا قبل ما نضيف لنشاء على طول

نحط النشاء مع ربع كوب ماء ونضعهم على الارز وقلب الى ان يغلظ قوامه

نصهم في كؤوس مفلطحة او اطباق

وعند التقديم
نضع طبقة من القشطة وبعدين الفواكه ونرش عليهم عسل على الوش

وبالهنا والش


********************************************



أفكار سريعة لتحضير اصناف حلوة في اقل من نص ساعة

@()@
الفراولة

لو عندك فراولة بعد ما تغسليهاقطعيها ترانشات ورشي عليها ملعقتين سكر وملعقتين ماء بارد وحطيها في التلاجة ربع ساعة وفي الوقت ده اضربي باكو كريم شانتيه
وبعدين وزعيها في اطباق وحطي عليها الكريمة

@()@
لو عندك كيك بايت او عملتيه وطلع بايظ
فرفتيه في طبق وحطي علية شوية قشطة او حليب وممكن جوز هند وقطع شكولاتة وممكن مكسرات محمصة واعجنيه واعمليه كرات ورصيه في صينية وحطي عليه صوص شيكولاتة منفوق

او

قطعيه مكعبات واعملي صوص شوكولاتة خفيف وممكن تعملي نسكافيه تخفيفه في شوية ماء تغطسي المكعبات من جميع الاتجهات في الشوكولا اوالنسكافيه على حسب النكهة اللي تحبيها وبعدين تغمسيها في جوز هند او فستق مطحون

@()@

رمان فريش
لو عندك رمان فرطيه ووزعيه في كاسات وحطي عليه سفن اب بيبقى طعمه حلو وساقع ومنعش في نفس الوقت

@()@
الايس كريم
لو عندك اي نوع عصير فايض بدل ما ترميه حطيه في قوالب الايس كريم ودخليه الفريزير وبعد ما يتجمد طلعيه وكليه زي الايس كريم ولو معندكيش قوالب الايس كريم ممكن في قوالب التلج وبعد ما يجمد نصف جمودية طلعية واغرسي في وسط كل مكعب خلةاسنان ودخليه الفريزير تاني يجمد للأخر
وممكن لو اتبقى كريم شانتيه تجمديه ويبقى ايس كريم

@()@
تورتة المانجو
لو عندك كمية بسكوت مكسرة فرفتيها خالص في الكبة مع سكر وزبد وافرديها في قالب واعملي العصير المفضل لك وليكن مانجو ودوبي فيه جيلاتين وباكوكريم شانتيه وصبيه على البسكوت ودخليه التلاجة ولما يجمد طلعيه من القالب وزوقيه من فوق بالكريمة وقطع المانجو

@()@
سلطة الفواكه
لو عندك بواقي فواكه قطعيها كلها وحطي عليها علبة عصير مانجو ووزعيها في كاسات وزينيها بوردات الكريم شانتيه
وبالهنا والشفا


********************************************
بودنج الشوكولا


المقادير :
3أكواب حليب
3ملاعق ونصف كبيرة نشا
3 ملاعق كبيرة كاكاو
نصف كوب سكر
الطريقة :ا
خلطي كل المكونات الجافة مع بعض على ان تتم اضافة الكاكاو بواسطة مصفاة لازالة الكتل وتقلب جيدا ثم تتم اضافة الحليب ويقلب الجميع الى تمام الذوبان على البارد
ضعيهم لى نار هادئة مع استمرار التقليب الى ان يغلظ القوام
صبي في كاسات أو قالب كبير
زيني الوجه بعد ان يبرد بالشكولا المبشورة او الفستق المطحون
وبالهنا والشفا...


********************************************

الاسكا شوكولا

اولا اعملي كيكة شوكولاتة خالية من الجلوتين عادية بس تكون في صينية مدورة ولما تبرد اقطعها مثلثات زي التورتة.
ثانيا اعملي ايس كريم شكولاتة: ايس كريم بودر خالى من الجلوتين وتخلطيه بالمضرب مع الحليب وبعدين تحطيه بالفريزر .
ثالثا : صوص شكولاتة تجيبي كسرولة وتحطي فيها مكعب زبدة ونص كوب سكر و2 ملعقة كبيرة كاكاو غير محلى وملعقتين ماءأو حليب وتقلبيهم على نار هادئة لحد ما تطبخ الشكولاتة وتسبيها تبرد خالص
التقديم
تجيبي طبق لفرد صغير وشيك تحطي مثلث الكيك وجنبه بولة ايس كريم الشكولاتة وفي الجنب التاني تجيبي موزة كاملة تقشريها وتحطيها في الطبق وتقطعيها ترانشات وفي النص ممكن تحطي ترانشتين كيوي وفراولةوبعدين رشي عليهم كلهم صوص الشكولاتة رايح جاي تخيلي الوان الطبق روووووووووووعة ده غير ان طعمه خطيييييييييييييروبالهنا والشفا

*******************************************
السوكسيه


المقادير :
3ملاعق كاكاو
نصف كوب سكر
200 جرام زبدة
فنجان ماء او لبن
2 بيضة
بسكويت سادة خالى من الجلوتين

الطريقة :
في كسرولة حطي الزبدة والكاكاو والسكر والماء وعلى نار هادية قلبيهم لحد ما تتطبخ الشكولاتة
سبيها لما تبرد خالص ضيفي عليه البيض واضربيهم جامد اوي
بعدين كسري البسكوت على اتنين وضفيه على الشكولاتة لحد ما البسكوت يغطي كل كمية الشكولاتة
وقلبي بخفة عشان البسكوت ما يتفرفتش وبعدين حطيهم في كيس بلاستيك او ورق فويل ولفيهم زي الاسطوانة
حطيها في الفريزر من 4ـ5 ساعات وبعدين وقت التقديم طلعيها وفكيها وقطعيها ترانشات ورصيها في طبق طعمها تحفة وشكلها شيك
وبالهنا والشفا

********************************************


اطباق من البطاطس

الطبق الأول
بطاطس بالسدق ( السجق)

المكونات
4 حبات بطاطس
2حبة بصل
3 فصوص ثوم
2 حبة طماطم
2 فلفل اخضر حامي بدون تقطيع
نص كيلو سدق بدون تقطيع
كمون / شطة/فلفل اسود/ملح
2كوب صلصة او عصير طماطم
زيت


الطريقة
في صينية كبيرة تقطع البطاطس والبصل والطماطم والثوم الى شرائح
يضاف اليهم السدق والفلفل والبهارات ويقلب الجميع
تضاف الصلصة والزيت وتدخل الفران الى ان تستوي

وبالهنا والشفا



الطبق الثاني


بطاطس مشوية في الفرن
جربوها رووووووووووووووعة

المكونات
بطاطس مقطعة مكعبات
ربع كوب زيت زيتون
ربع كوب حليب
عصير ليمون
ملح / زعتر بيتزا / ريحان مجفف / نعناع مجفف / كمون/ فلفل اسود
ممكن فص ثوم مبشور حسب الرغبة

الطريقة
تخلط جميع المكونات مع بعضا وتدخل الفرن

ساعات بضيف معاها مكعبات صدور الفراخ كمان بيكون طعمها حلو اوي




الطبق الثالث
الفراخ بالبطاطس والمشروم


المكونات
زيت زيتون
3 فصوص توم
صدور فراخ مقطعة مكعبات
مشروم مقطع شرائح
بطاطس مقطعة مكعبات
شوية مية
ملح / فلفل اسود


الطريقة
تسخن القلاية وبعده نضيف زيت الزيتون والثوم
نضيف الفراخ ونفضل نقلب يها لحدما تنزل ميتها
نضيف البطاطس والمشروم والبهارات والمية
نقلبهم ونهدي النار ونغطيهم لحد ما يستوي

وبالهنا والشفا



الطبق الرابع
بطاطس بالبيض
(طبق خفيف )

المكونات
2 حبة بطاطس مقطعة مكعبات صغيرة جدا

6 حبات بيض او اكتر او اقل حسب العدد

ملح فلفل اسود
سمنة

الطريقة في قلاية كبيرة نحط السمنة ونضيف البطاطس ونقلبها ونسيبها لحد ما تتحمر
نضيف لها الملح والفلفل الاسود ونسيبها شوية تتشرب الملح
نكسر عليها البيض ونقلبه لحد ما يستوي
تتاكل بالعيش او ممكن تتعمل سندوتشات بتبقى حلوة اوي في الرحلات


الطبق الخامس
بطاطس بالعصاج

المكونات
طاطس مسلوقة
زبدة
شوية حليب صغيرين
ملح / فلف اسود

كمية من اللحمة المعصجة

الطريقة
نهرس البطاطس وهي سخنة ونضيف له الزبدة والحليب والملح والفلفل
نجيب العيش الفينو ونحط طبقة من البطاطس وعليها طبقة من اللحمة المعصجة

طعمها حلوة اوي
وبالهنا والشفا



الطبق السادس
البطاطس باللحمة

المكونات
نص كيلو لحمة مقطعة مكعبات صغيرة
3 حبات بطاطس مكعبات
سمنة
ثوم
ملح / فلفل اسود/ مستكة / حبهان


الطريقة
تقدح السمنة في حلة ويضاف لها المستكة والحبهان ولما تسيح المستكة يضاف حوالي لتر ماء

لما يغلي تضاف اللحمة وتترك لحد ما تقرب تستوي

نضيف البطاطس والتوم والملح والفلفل ونقلبها ونسيبها لحد ما تستوي
في الاخر نضيف حتة سمنة او زبدة

وبالهنا والشفا




الطبق السابع

صينية بطاطس بالعصاج والجبنة

المكونات
بطاطس مقطعة شرائح
مقدار من العصاج
علبة جبنة مبشورة
كوب حليب
ملح وفلفل


الطريقة
تسلق البطاطس وهي مقطعة نصف سلق
ترص نصف كمية البطاطس في قارب ويفرد فوقها العصاج ثم النصف الاخر
يبهر الحليب بالملح والفلفل ويصب فوق الخليط وتتدخل الفرن

لما تقرب تستوي وتنشف السوائل تضاف طبقة كبيرة من الجبنة المبشورة وتدخل الفرن مرة اخرى
لما يحمر الوش طلعيها
وبالهنا والشفا



الطبق الثامن
بطاطس محشية

المكونات
بطاطس
عصاج
عصير طماطم
ملح زفلفل
سمنة


الطريقة

انا بحب في الوصفة دي البطاطس اللي حجمها كبير اوي وبقطع كل خبة 3 بالعرض
اخد كل جزء وبواسطة ملعقة صغيرة اقورها

اجيب قلاية كبيرة واحط فيها السمنة وقلي كل البطاطس من كل الجوانب
بعد ما تتقلي كلها اقلي الاجزاء اللي طلعت من التقوير واقطع معاهم بصلة كبيرة مكعبات وممكن فلفل اخضر وملح وفلفل

اخد الخلطة الاخيرة دي واحطها في قاع القارب وارص عليها البطاطس واحشيها بالعصاج
اصب فوقها عصير الطماطم بعد ما اسبكه شوية على النار ومعاه ملح وفلفل وبعدين ادخلها الفرن

كمان ممكن احط معاها كوسة واحشيها تو باذنجان صغير وكلهم بنفس الطريقة
بتتاكل مع الارز الابيض

وبالهنا والشفا



الطبق التاسع
البطاطس بالكفتة في الفرن

المكونات
للكفتة
لحمة مفرومة
ملح / فلفل
بصلة

بطاطس مكعبات
ثوم
عصير طماطم
ملح / فلفل


الطريقة
تقطع البطاطس مكعبات وتقلي في الزيت الى ان يحمر لونها
في هذه الفترة تبشر البصلة ناعم وتخلط مع اللحمة المفرومة والملح والفلفل وممكن نضيف ملعقة نشا او دقيق وتكور كور صغيرة


تحمر الكفتة في الزيت

في قارب ترص البطاطس المحمرة والكفتة المحمرة

في قلاية يصفر الثوم المبشور ثم يضاف اليه عصير الطماطم والملح والفلف ويترك يتسبك قليلا
يصب فوق البطاطس والكفتة ويدخل الفرن

وبالهنا والشفا
الطبق العاشر

كفتة البطاطس

المكونات
فرخة مسلوقة ومخلي عظمها
3 حبات بطاطس مسلوقة
بقدونس مفروم ناعم
بصل اخضر مفروم ناعم
1بيضة
1 كوب بقسماط خالى من الجلوتين مطحون
ملح / فلفل اسود

الطريقة


يفرم لحم الفراخ في الكبة

تهرس البطاطس ويضاف لها الفراخ والبيض والبقسماط والبقدونس والملح والفلفل والبصل
تشكل على شكل اقراص وتغمس في البقسماط المبهر ( فلفل اسود / بابريكا / بقدونس ناشف / ملح ) مع الضغط عليها وترص في صينية
دخليها الفريزير ربع ساعةحتى تتماسك
طلعيها اقليها في زيت غزير

وبالهنا والشفا


الطبق الحادي عشر
البطاطس المخبوزة

جيبي البطاطس بقشرها واغسليها كويس ولفيها بفويل ودخليها الفرن لحد ما تستوي

لما تتطلع شقيها شق بالطول وبواسطة بولة الايس كريم حطي فيها كورة زبدة وكورة لبنة

وبالهنا والشفا

ممكن بعد ما تتطلع تهرسيها جامد بالزبدة والحليب والملح والفلف الاسود
بيقدمو مع اللحمة المشوية والخضار السوتيه



شوربة العدس الأصفر

اولا بجيب حلة واحط فيها ماء واحطها على النار تغلي وبعدين اضيف مجموعة خضروات مقطعة ( كوسة بطاطس وبصل وفصين توم وطماطماية مقشرة وجزر ) والعدس وشوية ملح ولما الكل يستوي اطخنهم سواء في الحلة بطحنة الشوربة او في الخلاط
ثانيا جيبي حلة اخري حطي فيها زيت وحتة سمنة وابشري بصلة وفصين توم وقلبيهم واول ما تصفر ضيفي مشروم مقطع وكمون وملح وشطة ولو في بهارات اخري بتفضليها ولما كله يتحمر ضيفي عليها العدس وقلبيهم على نار هادية ولما يغلي غلوتين اطفي عليه
وبالهنا والشفا


********************************************
البيكاتا
المقادير

لحمة بتلو شرائح او صدور فراخ او صدور ديك رومي
بصل – فلفل اسود – مستردة – مشروم
دقيق
زبدة صفراء
عصير ليمون – زيت

الطريقة

تتبل اللحم البتلو بالملح والفلفل و المستردة وعصير الليمون.
تغمس في الدقيق الخالى من الجلوتين

تحمر اللحمة فى مقلاة بها زبدة وزيت الى ان تتحمر ثم يوضع عليها المشروم الفريش المقطع لمدة دقيقة واحدة ثم يوضع عليهاربع كوب كريمة لباني وتترك لمدة دقيقة اخرى..
وتجمل بقليل من البقدونس المفروم الناعم
وبالهنا والشفا

********************************************
فاهيتا الدجاج مع الارز الابيض

المقادير:

1/2 كيلو صدور دجاج مقطعة شرائح رفيعة او مكعبات ومبهره
(البهارات هي ملح + اورغانو + مسحوق الثوم + بهارات دجاج او مشكلة + فلفل اسود + ملعقة صويا صوص خالى من الجلوتين حسب الرغبة + شوية زيت + بابريكا )
بطاطا مقشرة و مغسولة و مقطعة مكعبات
زيت نباتي للقلي +القليل من الزبدة او المرجرين
حبة طماطم + بصلة كبيرة + فلفل رومي اخضر او الوان مقطع شرائح
عصير 1/2 ليمونة
ارز بسمتي ابيض مفلفل حسب طريقتك

الطريقة:

نضع القليل من الزيت وقطعة صغيرة من الزبدة او المرجرين في مقلاة غير لاصقة ونضيف الدجاج ونقلبه قليلا ونغطيه ختى يتشرب ماؤه ويتحمر
نضع البطاطس المقطعة في مقلاة اخرى مع القليل من الزيت ونقلبها قليلا على نار هادئة ونغطيها ونتركها حتى تقارب على النضج ونحركها بخفة حتى لا تتهرس معنا وتحافظ على شكلها مع اضافة الملح والفلفل الاسود لها
وعندما تقارب البطاطس على النضج ويحمر الدجاج قليلا نضيفهم الى بعض التالية ونحركهم بخفه
بعد ذلك نضيف لهم شرائح البصل والفلفل الرومي والطماطم على سطح المقلاة ولا نحركهم وممكن اضافة الفلفل الحار ونضيف عصير الليمون
ونغطيها ونتركها من 5 _10 دقائق على نار هادئة ثم نطفئ النار
وعند التقديم نحركهم بلطف وتقدم مع الارز

وبالهناء والعافيه


********************************************



الديك الرومي فيالفرن
(( شكله بيكون شيك أوي على السفرة ))


في البداية انا جبت الديك وزنه حوالي 7 كيلو وغسلته كويس أوي بالملح والدقيق والخل

وعملت له تتبيلة ودي طبعا كانت قبل العزومة بيوم كامل

مقادير التتبيلة
بصل مقطع شرائح رفيعه - عصير 5 ليمونات - عصيربرتقاله - 4 فصوص مستكه - 4 ورقات لاورو - 5 فصوص حبهان - ملح - فلفل اسود – نصف ملعقه صغيرة قرفه

الطريقة

ندعك البصل الشرائح مع الملح والفلفل والقرفه جيدا ونضيف عصير الليمون والبرتقال
ناخد الديك ونتبله من كل الجهات وبين الجلد واللحم فى الصدر ومن قلبه ...نضع داخله ورقتين لاورووفصين مستكه و3 فصوص حبهان
نضعه فى وعاءعميق مقلوب على وجهه يعنى الصدرلاسفل ليتشرب جيدا من التتبيله



ثانى يوم
نشيل الديك من التتبيله ونصفيه من السوائل
ونشيل كل البصل اللى على جلدة من برة
فى صينيه واسعه نسخن سمن ومعه فص مستكه لتشويح الديك
نبدانشوح الديك فى السمن من كل الجهات ومن عند الرقبه
بحيث ياخد لون جميل من كل الجهات بالتساوى
الخطوة دى مهمه جدا جدا فى قفل مسام الديك والحفاظ على طراوة لحمه فى السوا فى الفرن وايضا بتخلى مافيش اى زفارة ولا اى شىء مش مرغوب يطلع منه

نحضر صينيه الفرن اللى هانسوى فيها الديك
تكون صينيه حجمها مناسب وعاليه الحواف
نبطنها بالفويل
نضع فيها فصين مستكه وفصين حبهان وورقتين لاورو وبصل مقطع شرائح ومدعوك بالملح والفلفل والقرفه وعصيرليمون



نضع فوقها الديك بعد ماشوحناهمهم جدا ان الديك يستوىويفضل سليم من برة ...لا يتكسر من الوسط ولاجلدةيتقطع


نضع نصف كوب ماء فى الصينيه ونغطى الصينيه بالكالمل بالفويل
نضعها على البوتاجاز لتبدجاتغلى
ندخلها الفرن على حرارة 220 مئويه اسفل الفرن

مهم جدا
علشان نعرف سواالديك
كل كيلو جرام من الديك محتاج نصف ساعه سوا فى الفرن
يعنى الديك اللى وزنه 7 كيلوجرام محتاج 3 ساعات ونصف فى الفرن


كل نصف ساعه نفتح على الديك ونشربه من السوائل اللى بتنزل منه.....ليه؟
اولا: علشان يفضل لحمه طرى وجلدةمايتقطعش
ثانيا : علشان يتشرب بالطعم من السوائل دى ويكتسب لون جميل .

بعد مرور ساعتين ونصف
نكشف الفويل من على الديك
نتركه يكمل نضجه فى النصف ساعه الاخيرة وهومكشوف
الخطوة دى مهمه علشان جلدة يبقى كرانشى ولونه محمروجميل
بعد نهايه النضج ممكن تفتحى له الشوايه على خفيف لزيادة تحمير الوجه حسب رغبتك

طلعيه من الفرن
انقليه بحرص على صينيه تانيه



غطيه على خفيف بالفويل وثقبى الفويل ثقوب كتير بالسكين علشان البخار يطلع علشان ما الديك يبطل نضج وكمان يحافظ على جلدة كرانشى ... واتركيه يهدا من حرارةالفرن


الديك الرومى لا يقطع ابداااااوهو ساخن حتى لاتخرج منه سوائل ويجف لحمه

ننتظر الى ان تفتر حرارة الديك يعنى ممكن نضع يدنا عليه يكون فاتر

ثانيا (( انا بحب احط الديك على سرفيس كبير فيه رز بالخلطة ))



المقادير
بصلة صغيرة مبشورة - حبة طماطم واحدة مبشورة من غيرالقشر - ارز- سمن - شوربة دسمة - نصف ملعقة صغير قرفة - ملح وفلفل اسود - زبيب - مكسرات محمصة - حسب الرغبة كبد وكلاوي فراخ أو الديك مستوية

الطريقة
يصفر البصل في السمن ثم يضاف غليه الطماطم والملح والفلفل ويقلب
يضاف الزبيب والقرفة حتى ينتفخ الزبيب
يضاف الارز ويقلب
تضاف الشوربة
قللي النار وغطيه حتى تمام النضج
وقت التقديم
يفرغ الارز في السرفيس الكبير وترش فوقه المكسرات والكبد والكلاوي

********************************************



طاجن البامية باللحمة في الفرن

المقادير
كيلو بامية زيرو
نصف كيلو لحمة مكعبات
عصير طماطم
ملعقة صلصة
سمن
بصلة مبشورة
قرفة حسب الرغبة
ملح وفلفل اسود
قرنين فلفل اخضر
توممفروم
ليمون

الطريقة
تصفر البصلة في السمن ثم تضاف مكعبات اللحمة وتقلب ولماتنزل ميتها نقلب فيها لحد ما تشربها تاني

نضيف عصيرالطماطم والصلصة ونغطيها لحد ما تدخل اللحمة في السوا

نضيف البامية والفلفل الاخضر والملح والفلفل ونتركها غلوتين ونزود المية لواحتاج الامر

نصبها في الطاجن وممكن نرش عليها شوية قرفة وندخلها الفرن لحد ما تتسبك وتستوي

وقت التقديم
نفرم التوم ونحط عليه عصير ليمون كتيير ونحطه في طبق جانبي ونرش على البامية من فوق وقت الاكل _( كل واحد يرش على طبقه )

طبعا وما فيش عزومة تخلو من ورق العنب
[
الحشو
صطاطم مبسورة
بصل مشور
بقدونس وشبت ونعناع مفروم
كوبين ارز
ملعقتين صلصة
ملح وفلفل اسود ونعناع ناشف

الطريقة
تخلط جميع المكونات
يلف ورق العنب ويرص في الحلة او الصينية
هاتي كوبين شوربة وضيفي عليهم ملعقة صلصة وملعقة صغيرة ملح الليمون وشويةملح صغيرين وفلفل اسود ودوبيهم وحطيهم على ورق العنب
وملعقةسمن على الوش وغطيه وحطيه على النار لحد مايستوى
اقلبيه فيسرفيس

ممكن لو عندك شرايح لحمة بتلو رفيعة رصيها مع شرائح بصل وتتبيلة بالملح والفلفل والليمون ورصيهم في قاع الحلة ولما تقلبي ورق العنب بيكونوا على الوش

********************************************


عزومة سمك


يالا نبدأ باسم الله

الصنف الأول
طاجن سبيط

المكونات : بصل مقطع - طماطم مقطعة - بقدونس وشبت مفرومين ـ ارجل السبيط - ملح - فلفل - كمون - شطة - صلصة طماطم - زيت
الطريقة :
نضع الزيت في مقلاية عميقة ونحمر البصل لحد ما يكون لونه ذهبي غامق
نضيف عليه الطماطم ونقلبها لحد ما تتدبل شوية بس من غير ما تتهري
نضيف السبيط والتوابل ونقلبهم لحد ما ينزل المياة بتاعته
نضيف الصلصة ونقلبها
نضيف البقدونس والشبت وتقلية واحدة على الماشي ونسيبه دقيقتين
نفرغ المقدار كله في طاجن فخار وفارب بيركس وندخلها الفرن لحد ما يتسبك ويستوي


الصنف الثاني
سمكك هامور مقلي بصوص الزبدة والليمون
نجيب السمك ويكون مقطع ترانشات بجلده وعظمه وحتى الراس مش مشكلة ونغسله كويس
في قالب غويط نضع عصير ليمون كتييير وملح وكمون وشطة وكام فص توم مفرومين ناعم ونص كوب حليب ونقلبهم على بعض ونتبل بيهم السمك ونتركه ساعة على الأقل في التتبيلة
بعد كدة ناخد السمك ونغمسه في الدقيق الخالى من الجلوتين ونقليه قي الزيت كويس ونرصه في السرفيس التقديم ونجمله بالبقدونس
نجيب زبدة ونحطها في قلاية ونحط عليها كام فص توم مفرومين ناعم جدا ولما يصفر نضيف عصير ليمون كتير وشوية ملح ونقلبهم كويس ويترك شوية على النار وبعدين نحط ملعقتين كريمة لباني او حليب ونرشهم على الوجه



الصنف الثالث
طاجن سمك الوقار
بعد ما نقطعه ترانشات كبيرة ونغسله نتبله بالملح ونتركة نصف ساعة
ونعمل الطاجن زي طريقته بتاعت السبيط بس بد ل ما نضيف السبيط نضيف السمك بعد غمسه في الدقيق الخالى من الجلوتين وقليه ونقلبه معع الخلطة وندخله الفرن


الصنف الرابع
سمك البوري الصينية
نجيب سمك البورة ونفتح بطنه ونعمل فتحات بالورب على الناحيتين ونغسله ونتبله بالملح
نجهز الحشوة وهي عبارة عن توم وبقدونس مفروم مضاف اليه ملح وكمون وليمون
نحشي البطن والفتحات اللي عملناها على جسم السمكة
نجيب حبتين بطاطس نقشرهم ونقطعهم ترانشات ونتبلهم بباقي خلطة السمك ( البقدونس والتوم ) ونرص البطاطس في القارب وبعدين نحط فوقهم السمك ونرش زيت على الوجة وشوية ماء صغيرين اوي ونغطيهم بالفويل وندخلهم الفرن
بعد ربع ساعة نشيل الفويل ونسيب السمك يكمل السوا ويتحمر من الوش


الصنف الخامس
سردين مقلي
نشتري السردين اللي حجمه كبير شوية وبعد ما ننظفه ونفتح بطنه ويتغسل كويس
نتبله بالملح والكمون والشطة والليمون ونتركه لمدة نصف ساعة على الاقل
نغمسه في الدقيق ونقليه عادي جدا ونقلي معاه فلفل اخضر وشريحتين ليمون
يرص في السرفيس ويجمل بالفلفل المقلي والليمون والبقدونس والمهم في الموضوع انك تعصري عليه ليمون كتييييير اوي بيديله طعم رااااااااائع


الالصنف السادس
جمبري
المكونان : فلفل ملون ( احمر واصفر واخضر ) مقطع مكعبات - ليمون-كسبرة حضراء متقطفة - توم - زيت زيتون - جمبري مقشر ومتنظف
نجيب مقلاية عميقة ونسخنها كويس ونضع فيه زيت الزيتون والتوم
قبل ما يصفر التوم نضيف الفلفل الالوان
نقلبهم كويس وبعد دقيقتين نضيف الجمبري ونقلب لحد ما ينزل ميته ويشربه ( مش بياخد سوا كتير ) ونحط الملح والكمون
لما يستوي الجمبري نضيف ليمون كتير والكسبرة الخضرار ونطفي النار على طول



الصنف السابع
كابوريا في الفرن
نجيب الكابوريا ونظفها بحيث اننا نشيل الرجلين ونفتح الصدفة ونرميها والجزء اللي فيه اللحم نغسله كويس ونشيل منه الحاجات اللي لونها اصفر والزعانف البيضاء
بعد الغسيل نرصها في صينية الفرن والرجلين نرصها في صينية أخرى
نحضر الخلطة وهي عبارة عن توم مفروم وليمون وخل وملح وكمون خفيف وشطة وممكن فلفل اخضر مفروم ناعم اوي وزيت
نحلط كل دول وبالملعقة نحط في كل حبة كابورية شوية وطبعا نسقي بيها لحم الكابوريا ونحطها في الفرن لحد ما تستوي
اما باقي الخلطة نزودها شوية ماء ونخلط بيها الرجلين ونحطها هي كمان في الفرن



الصنف الثامن
سمك فيليه مشوي مع الخضار


نجيب اي نوع سمك فيليه نغسله ونتبله بالملح والكمون والشطة والتوم والليمون ودبس رمان ونتتركه لمدة ساعة
نجيب مجموعة خضروات ونقطعها شرائح ونتبلها بتتبيلة زي بتاعت السمك ونتركها شوية ( بطلطس - باذنجان - فلفل الوان - كوسة - جزر - بصل - مشروم - ثوم - طماطم )
ممكن كمان كحلو جنب المشاوي دي تشوي اناناس وتفاح وبعد الشوي رشي عى الوش عسل ابيض
بتجيبي الشواية سواء كانت كهرباء او على البوتاجاز وتدهنيها زيت زيتون او لو عندك بخاخ زيت الكانولا بيبقى حلو في الشوي وتبدأي بشوي الخضار واللي يطلع ترصيه في سرفيس كبير
وبعدين تشوي السمك وترصيه معاهم في نفس السرفيس
وترشى على الوش ليمون


الصنف التاسع
ملوخية بالجمبري
بعد ما تجيبي الملوخية وتقطفيها وتغسليها وتنشفيها وتخرطيها او لو كانت مجمدة
بتجيبي الجمبري تقشريه وتغسليه كويس وتسلقيه نصف سلق في الماء
بتنشليه من الماء وتاخدي الماء ده وتحطي فية شوية من تقلية الملوخية النية ( توم وكسبرة ناشفة وفلفل وملح وجوزة الطيب ) وتسبيها تغلي معاه وممكن تضيفي معلقة صلصة
بعد كدة تتضيفي الملوخية وتقلبيها كويس على نار هادية وترفيعها من على النار
تعملي التقلية في شوية سمنة بس اول ما تحطيها وتبدأ ريحتها تتطلع ضيفي ليها الجمبري وافضلي قلبي لحد ما التقلية تتحمر ( المهم يكون الجبري متصفي كويس وناشف مفيهوش ماء )
طشي التقلية على الملوخية وقلبيهم على نار هادية واول ما تبدا ح تغلي اطفي النار المهم ماتخليهاش تغلي



حلقات السبيط المقلي المقرمشة
هاتي سبيط بس خليه على شكله ( زي القرطاس ) من غير ما تفتحيه ونضفيه واغسليه كويس
قطعيه حلقات بسمك 1 سم وتبليه بالملح والكمون والشطة
هاتي شوية دقيق خالى من الجلوتين وضيفي عليه شوية بقسماط خالى من الجلوتين وملح وكمون وبابريكا وبقدونس ناشف
اغمسي السبيط في الدقيق واقليه في زيت غزير وحطيه على ورق المطبخ
بعدين حطيه في سرفيس ورشي عليه ليمون


سمك هامور تكا

المكونات : سمك هامور مكعبات – فلفل مكعبات – بصل مكعبات - طماطم معبات – مشروم – كمون – شطة – ملح – ليمون- توم – دبس رمان
الطريقة
• تخلط جميع المكونات مع بعضا وتترك لمدة ساعتين
• يرص مكعبات السمك بالتبادل مع الخضروات في اسياخ الشيش
• تحمر في زيت غزير او ترش بالزيت وترص في صاج وتشوى بالفرن
**********************
اما السلطات
فسلطات السمك انواعها كثيرة واكلة السمك لا تكون ناجخة الا بكثرة السلطات


1- سلطة البنجر
يقشر البنجر ويسلق وبعدها يقطع مكعبات صغيرة ويتبل بالملح والسماق والخل والليمون والزيت وقليل من التوم المفروم ناعم والكمون

2- سلطة البطاطس
تسلق البطاطس ثم تقشر وتقطع مكعبات صغيرة وتتبل بالبقدونس والفلفل الأخضر والثوم المفروم والملح والفلفل الاسود والليمون والخل والزيت والكمون

3- سلطة الطحينة
في طبق عميق ضعي 4 مىعق كبيرة طحينة واعصري عليهم لمونتين وشوية خل واضربيهم كويس لحد ما يبقو زي العجينة وبعدين ضيفي الماء البارد لحد ما توصلي للقوام اللي انتي عايزاه وبعدين حطي الملح وكل البهارات اللي قلبك يحبها ( ملح – فلفل اسود – كمون – شطة – بهار – كسبرة – جوزة الطيب )

4- سلطة بابا غنوج
هاتي ثمرة باذنجان واشويها في الفرن ولما تخلص قشريها وبالشوكة اهرسيها وضيفي عليها طحينة وليمون وزيت وتوم وفلفل اخضر وملح وكمون وشطة

5- سلطة الكافيار
هاتي خس وقطعيه وقطعي عليه طماطم مكعبات وقطعي مكعبات جبنة شيدر وجمبري صغير مقشر ومسلوق وحطي عليه صلصة وقلبيهم مع بعض وبعد ما تحطيهم في طبق التقديم قطعي بيض مسلوق الى ترانشات وخطي عليه الكفيار

6- سلطة الفتوش
هاتي مجموعة خضروات ( خس – خيار – فجل احمر – طماطم – فلفل اخضر كبي – بقدونس – نعناع ) اغليهم وقطعيهم مكعبات واخلطيهم مع بعض وحطي عليهم ملح وسماق كتير وبعدين في كوب اخلطي زيت زيتون وخل وليمون ودبس رمان وقلبيهم واخلطيهم مع الفتوش
7 – كوسة وفلفل وباذنجان بالخل والتوم

هاتي الباذنجان قطعيه وانقعيه في ماء وملح وقطعي الكوسة شرايح والفلف الكبي كمان شرايح والفلفل الاخضر الططويل وتبليهم بالملح وبعدين اقلي الجميع ورصيهم بطريقة حلوة في سرفيس وبعدجين في قلاية صغيرة حطي شوية زيت وصفري فيهم ثوم مفروم وبعدين حطي عليه الخل وملح وفلفل واقلبيهم على الوش

8 – باذنجان بالطماطم
قطعي الباذنجان واقليه واقلي معاه فلفل ورصيهم في سرفيس وبعدين في قلاية تانية حطي شوية زيت وصفري فيهم شوية توم مفروم وبعدين ضيفي مكعبات طماطم وفلفل اخضر مقطع ولما تتدبل شوية الطماطم ضيفي خل وملح وفلفل اسود واقلبيها على الوش

او ممكن طريقة تانية تجيبي توم وتصفريه وبعدين تضيفي عليه صلصة او عصير طماطم وملح وفلفل وكمون ولما يتسبك تتضيفيه على الباتنجان

ممكن كمتن تستبدلي الباذنجان ببطاطس مقطعة قطع كبيرة

اما رز السمك
بحمر بصلة كبيرة لحد ما تكون قربت تتحرق واضيف عليها مكعبات طماطم وفلفل مكبب واقلبهم ( ممكن تضيفي هنا الجمبري المقشر او السبيط ) واضيف ملعقة كمون كبيرة وشطة واقلبهم وبعدين اضيف ماء بكمية زائدة وافرم فص ثوم واضيفه واسبهم يغلو جامد اوي لحدعيار الماء ما يقل ولو عايزة تحطي معلقة صلصة صغيرة حطي وبعدين اضيف الملح والرزواسيبهم على نار هادية
الطريقة الثانية افرم ثلاث فصوص توم واصفرهم في الزيت ( ممكن تضيفي جمبري )وبعدين اضيف مقدار الماء وملعقة صلصة وكمون وملح وشطة ولما يغلي اضيف الرز

وبالهنا والشفا





********************************************



الفول المدمس


المقادير
كوبين من الفول
ملعقة عدس أصفر
ملعقة أرز
ليمونة



الطريقة
1 - ينقى الفول ويغسل وينقع طول الليل
2- في قدرة ( بحب اعمل فيها الفول ) ويوضع فيها الفول والعدس والارز وتقطع الليمونة على 4 ويغطى كل هذا بالماء وتغطى بالغطاء
3- يوضع الجميع على السخان الخاص حوالي 5 ساعات
4- بعد ما يستوي ويبرد يقسم على أكياس في الفريزر



ملحوظة
1- الليمونة فائدتها ان الفول ما يسودش
2- الارز والعدس فائدتهم بيخلي المية بتاعت الفول كثيفة وطعمها حلو
3- لو المية نشفت ممكن تزوديها بس بمية مغلية
4 - خلي الفول لحد ما يبرد عشان مايسودش


وصــــــــــــــفات الفـــــــــــــــــول
على طريقتي الخاصة


1- هاتي الفول وضيفي عليه طحينة وليمون وملح وكمون وقلبي كويس واهرسيه لو بتحبي
2- قطعي عليه طماطم وخيار وفلفل أخضر وقلبي ورشي زيت على الوش

الفول بالفلفل الحار والليمون

1- في طبق كبير قطعي فلفل أخضر حار وزيت وليمون وكمون وملح وحطي عليهم الفول وقلبيهم وممكن تهرسيه


الفول بالتوم

1- في حلة حطي شوية زيت وحمري فيه فصين توم مفرومين
2- ضيفي اليهم طماطم مقطعة وفلفل اخضر وقلبيهم شوية
3- ضيفي الفول وحتة صلصلة طماطم صغيرة وملح وكمون وشطة ( حسب الرغبة ) ولو تحبي كمان ليمون
وبالهنا والشفا


********************************************

الفلافل
المقادير


كيلو فول مدشوش
حزمة كسبرة خضراء
حزمة بصل اخضر او حزمة كرات
3 بصلات
نصف راس ثوم
شطة / ملح / كسبرة ناشفة مطحونة / كسبرة ناشفة حب / كمون
سمسم وبيكربونات صوديوم (عند القلية )


الطريقة
1- ينقى الفول ويغسل وينقع طول الليل حوالي 12 ساعة
2- تغسل الخضرة جيدا ويقشر البصل والتوم ويقطع الجميع ويخلطو مع الفول بعد تصفيته
3- في الكبة يطحن الجميع او في مفرمة اللحمة لحد ما نحصل على عجينة ناعمة
4- يضاف اليها البهارت وتقسم على اكياس في الفريزر
5- عند الحاجة تطلعي الكيس ولما يفك تحطي نص ملعقة بيكربونات صوديوم او ملعقة صغيرة بيكنج بودر ويخلط وتكور وتغطى بالسمسم وتقلى

ملحوظة

1-ما تزوديش الخضرة لأن كل ما تزودي الخضرة عند القلية الفلافل تفرول منك
2-البيكربونات تضاف قبل القلية على طول عشان طعم الفلافل ما يتغيرش
3-يضاف السمسم قبل القلية على طول عشان ما يطراش
4-ممكن تضيفي بيضة مع العجينة وتقليها
وبالهنا والشفا








avatar
angooga
Admin
Admin
عدد المساهمات : 54
تاريخ التسجيل : 19/05/2011

دليل متكامل لاروع و أسهل اكلات ملوكة  Empty رد: دليل متكامل لاروع و أسهل اكلات ملوكة

الخميس 18 أكتوبر 2012, 10:19
تقييم المساهمة: 100% (1)
تسلم الأيادي على الوصفات الجميلة دي .. جربت طريقة الكسكسي الحلو بالذرة الصفراء والبيضاء والأرز الأبيض بنفس الطريقة في حلة الضغط وطلع طعمة حلو بالسكر وجوز الهند .
وردشان
وردشان
Admin
Admin
عدد المساهمات : 206
تاريخ التسجيل : 15/05/2011
https://gluten-free.forumegypt.net

دليل متكامل لاروع و أسهل اكلات ملوكة  Empty رد: دليل متكامل لاروع و أسهل اكلات ملوكة

السبت 07 فبراير 2015, 09:30
الف هنا
بس عملتيه في حلة الضغط ازاي؟ يا ريت توصفي لنا شكرااا
الرجوع الى أعلى الصفحة
صلاحيات هذا المنتدى:
لاتستطيع الرد على المواضيع في هذا المنتدى