خالي من الجلوتين السلياك وحساسية القمح فى مصر Celiac gluten free Egypt
أهلا وسهلا! سعداء جدا بزيارتك!

خالي من الجلوتين السلياك وحساسية القمح فى مصر Celiac gluten free Egypt

Celiac Patients' Support Group in Egypt
 
الرئيسيةاليوميةمكتبة الصورس .و .جبحـثالأعضاءالمجموعاتالتسجيلدخول

شاطر | 
 

 بعض الاسئلة و الاجوبة التى تساعد فى تنفيذ الوصفات

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
manoona
Admin


عدد المساهمات : 217
تاريخ التسجيل : 17/05/2011

مُساهمةموضوع: بعض الاسئلة و الاجوبة التى تساعد فى تنفيذ الوصفات   الإثنين 27 يونيو 2011, 18:38

طب شكل الكاب ده إيه اللى عايرتى بيه المقادير؟ قصدك مج الشاى العادى؟

بصى يا حبيبتى الكاب دة معيار بيتباع فى محلات الادوات المنزلية و لو مش متوفر ممكن تستعملى ماج شاى بس يكون كبير مش صغير

عايزه اسئليك على الزيت لو عملت بالزيت هيطلع طعمه حلو وهل جربتيه ؟

بالنسبة للزيت مفيش مشكلة اى وصفة ممكن نستبدل السمن بالزيت تبقى حلوة بس يكون الزيت اللى حتستعمليه بدون نكهة مميزة

عملت مقادير كوكيز العسل الاسود بالظبط و حطيتها فى التلاجة دلوقتى بس دى زى الكيكة بالظبط هعملها كور إزاى؟

هى عجينة الكوكيز بتبقى طرية بس مجرد دخولها التلاجة بتمسك و حتعرفى تكوريها

ياريت اعرف حل لتحبيب دقيق الارز ؟

لو دقيق الارز ناعم اوى مش حيحبب خالص لو النوع اللى بتستعمليه خشن شوية حاولى تنخليه بمنخل حرير و خدى الناعم استعمليه فى المخبوزات و الخشن استعمليه فى البسبوسة


بتعايرى بدقة كدة إزاى؟ ½ 7 جرام خميرة فورية؟

موجود فى محلات الادوات المنزلية مكاييل للملاعق الملعقة الصغيرة تساوى 5 جم فمقدار الخميرة للوصفة دى حوالى واحد و نصف ملعقة صغيرة

ايه هو ورق الخبز هو ورق الزبده ؟

ورق الخبز هو زى ورق الزبدة هو بيتباع زى الرول و مرسوم عليه بسكوتات هو مخصوص للخبيز

انا جربت وصفة البسكوت المشكل بس انا محطتش دقيق ذره كله حطيت نشا ودقيق ذره يعنى قليليته شويه مش عارفه اقوليلك ايه غير انه انجح بسكويت خالى من الجلوتين بس هو كان بيلزق فى ايدى اوى حتى بعد ما دخلته فى الثلاجه فحطيت نشا تانى 3 اواربع ملاعق فاكيد انا عملت حاجه غلط لانه كان بيلزق فى ايدى وكان صعب تشكيله بس برده اصرفت

بصى قى كذه سبب انها ممسكتش اول حاجة انتى بتعايرى الدقيق بايه ؟ و بعدين انتى بتقولى استعملتى شوية نشا فالنشا مش بيمسك زى الدقيق و بعدين ساعات البيض بيبقى كبير شوية عموما لما تنفذى اى وصفة لازم يكون جنبك شوية دقيق زيادة عشان لو احتاجتى تزودى بس الزيادة تكون بالعقل عشان البسكوت مينشفش


انتى قصدك فى وصفة البسكوت المشكل سكر بودرة؟
السكر الناعم هو البودرة يا ورد انا قاصدة اكتبه ناعم عشان اختلاف اللغة فى اى وصفة فيها سكر ناعم يبقى بودرة

بمناسبة موضوعك الجميييييل بتاع الأسئلة عندى سؤال عملت إمبارح البسكوت
تانى بنفس المقادير و الطريقة بالظبط و برضة العجينة كانت زى بتاع الكيك مهما أحطها فى التلاجة
ربنا هدانى شكلتها بقمع الكريم شانتيه و طلعت جميلة بس نفسى تبقى متماسكة
لإن ابنى شبطان فى البسكوت اللى على شكل دباديب أفيال و كده عايزة أعرف أشكله
امبارح زودت الدقيق تانى بعد ما سبتها فى التلاجة برضه متماسكتش .. أعمل إيه؟


انا عمالة افكر يا ورد ممكن السبب يكون ايه ممكن تقللى السمن شوية و استعملى بيضة كاملة و صفار البيضة التانية بس يمكن البيض عندكم اكبر من عندنا و ادهنى البسكوت ببياض البيضة و بعدين انا بحرص ان يكون الدقيق بالظبط لان سهل ان احنا نزود بس البسكوت بينشف و انا عايزاه يبقى هش و حلو
و حاجة تانية يا ورد ما تضربيش البسكوت كتير يعنى اضربى السمن و السكر و البيض جامد و لما تبتدى تضيفى الدقيق قلبى العجين بالراحة و ربنا يوفقك فى التجربة الجاية

ينفع نستعمل دقيق الارز بدا دقيق الذره فى او وصفه ؟

انتى ينفع تستعملى دقيق ارز لوحده بس النتيجة لما بتخلطى بتديكى نتيجة احسن و فايدة اكتر لانها بتاخد الفوايد اللى فى الارز و الذرة و التابيوكا



بتجيبى المقادير منين من مصر؟ الارز اللصق أو الغراوى و التبيوكا و نشا البطاطس؟

نشا البطاطس و التابيوكا متوفرين هنا فى مصر فى السوبرماركتات الكبيرة اما الارز اللصق هو مش متوفر فى السوبرماركت بس فى شركة بتستورده فى مصر

ليه سؤال فى وصفة البيتزا بالخضروات ممكن احط ايه بدل علبه الزبادى ؟

لو فيه مشكلة مع الزبادى ممكن تعصرى نصف ليمونة على ماء العجن و تعجنى بها بس فى الحالة دى حتزودى ماءالعجن شوية بدل الزبادى

فى وصفة الكريب كتير بتتكسر منى أو تلزق ؟


لو بتلزق منك يا ورد حاولى تمسحى الطاسة بمسحة زيت خفيفة جدا و تكونى مسحنة الطاسة كويس اوى قبل ما تحطى فيها الكريب

لازم صمغ زانتان هنا فى وصفة خبز التورتيلا؟

ممكن متحطيش زانثان و حتبقى حلوة بس اعملى كمية صغيرة للاكل علطول

انتى قصدك فى وصفة التورتيلا ربع كوب نشا بطاطس وربع كوب نشا تبيوكا والا الاتنيين مع بعض ربع؟

الاتنين مع بعض يعملوا ربع كاب

يمكن فى وصفة التورتيلا نستعمل بدل اللبن الساخن ماء ساخن؟

بدل اللبن استعملى ماء ساخن مفيش مشكلة

فى وصفة التورتيلا العجينة هنا تكون متماسكة او لزجة شوية؟

العجينة بتبقى فعلا لزجة شوية

المقادير ازاى بتعاييرها بالجرام انا عندى المعالق والكوبايات بس مش عارفه المقادير بالجرام؟

انا المقادير اللى بالجرام باوزنها على ميزان المطبخ اما بالنسبة للكميات الصغيرة فالملاعق المكيال مكتوب عليها المكيال بالجرام و بالملعقة

ليه سؤال دقيق الارز الناعم اووووووى انتى بتطحينه ؟

انا بطحن الرز فى مطحنة سكر فى باب الشعرىة عشان يطلع ناعم لانى جربت طحنه فى البيت بيبقى خشن بس فيه طريقة تانية تقدرى تعمليها فى البيت و هى انك تنقعى الرز فى مياه لمدة نصف ساعة و بعدين تصفيه و تنشفيه كويس عشان ميعجنش و بعد كدة تطحنيه

فى وصفة الرقاق انتى بتقصدى دقيق ذره ابيض ولا اصفر ولا ممكن نستعمل اى حاجه؟

انا باستعمل دقيق الذرة الابيض علطول علشان بيبقى لونه احلى فى المخبوزات بس لو عايزة تستعملى الاصفر مفيش مشكلة براحتك

ازاى نطلع 3 درجات من دقيق الذرة وبتعمليى بكل نوع ايه ؟

انا بطلع منه 3 درجات كالاتى:
الدرجة الاولى:الاول بانخله بمنخل سلك و اللى ما بينزلش من المنخل السلك بيبقى خشن اوى طبعا و دة انا باستعمله بدل الردة لو عايزة تحطى رشه منه على خليط الدقيق اللى بنستخدمه فى العيش الكايزر او التوست و ممكن ترشيه على وش العيش زى ما انا عاملة فى وصفة العيش البنى بدل دقيق الحنطة
الدرجة التانية:بانخل الباقى بمنخل حرير و اللى يفضل و مينزلش من المنخل الحرير دة بيبقى عامل زى سميط البسبوسة و دة انا باستعمله فى البسبوسة
الدرجة التالتة: اللى بينزل من المنخل الحرير دة بيبقى ناعم و باستعمله فى الخبيز
و كل اللى فات دة بالنسبة لدقيق الذرة مس الارز طبعا اما الارز فليه استعمالات تانية

وليه سؤال طحنت 5 كيلو دقيق رز اسمر بس للاسف كانت المطحنه مطرحها كمون فالدقيق ريحته كمون وهويته وبرده مفيش فايده تنصحينى اعمل بيه ايه والى هايتبقى بعد النخل اعمل بيه ايه ؟

بالنسبة للدقيق اللى ريحته كمون فهو ريحته غالبا مش حتروح مهما هوتيه فأمرك الى الله استعمليه فى الحاجات الحادقة زى البقسماط ممكن العيش بس بلاش فى الكيكات و الحلويات عشان نكهة الكمون حتبوظها و بعد كدة لما تطحنى اطحنى كيلو سكر او حبة جوز هند قبل الدقيق عشان ينظف به المطحنة و يشفط اى ريحة توابل انتى عالرفة انا عندى فى البيت لما اكون عايزة اطحن مكسرات او اى حاجة فى الكبة و طبعا الكبة بتبقى ريحتها بصل فبطحن شوية جوز هند بيشفطوا اى ريحة للبصل من الكبة

عايزه افهم بالنسبه لدقيق الارز مش ممكن الى هيتبقى بعد النخل استخدمه برده كدقيق بسبوسه؟

ممكن طبعا يا حور تستعمليه فى البسبوسة بس لازم تحطى معاه دقيق ذرة بيبقى افضل و دقيق الارز الخشن انا باستعمله فى وصفات تانية لسة منزلتهاش زى الكفتة مثلا بعجن بيه بدل البقسماط جوه العجينة مش من برة

بليز ابقى اكتبى لى قصدك ايه بدرجة حرارة متوسطة لكل وصفة كام بالظبط و احط الصاج تحت و لا فى النص ؟

اى وصفة بتوضع فى الرف الاوسط فى الفرن الا لو ذكرت عكس كدة اما الفرت متوسط الحرارة هو زى درجة الحرارة اللى بتخبزى فيها الكيك

فى وصفة البقسماط مش عارفه هو هيمسك كده ومايفروليش ؟

انا مبحطوش فى التلاجة بس لو معرفتيش تشكليه على ايدك حطيه فى التلاجة شوية او فى طريقة تانية اقطعى حتة العجين و ابرميها خفيف فى ايدك و بعد كدة كملى برمه فى الصاج اللى حتخبزى فيه عشان يبقى اسهل

اعتقد القطايف بنفس طريقة البوريك صح؟

القطايف عجينة تانية انا بحاول انزل اكبر قدر قبل رمضان ربنا يسهل

هى قطاعات البسكويت البلاستيك كويسة زى المعدن؟

مفيش مشكلة فى القطاعات البلاستيك لو حسيتى انها حتلزق حطيها فى شوية دقيق كل شوية و انتى بتقطعى

انا بعاير بكوبيات شريها عباره عن اربع كوبيات استلس ربع وتلت ونص وكوب وانا بتخل الدقيق فى المنخل الحرير وبعدين اعايير منه فى كل الحاجات فهل انا كده صح ؟

لو انتى بتنخلى كمية الدقيق اللى طحنتيها بالمنخل الحرير مرة واحدة و بعد كدة تخزنيها بعد كدة لما تيجى تستعمليه فى اى وصفة عايريه الاول و انخليه بمنخل سلك عادى عشان الهوا يدخل فيه مش اكتر


انا هاعمل نص الكميه فى وصفة البوريك هاينفع صح ؟

مفيش مشكلة لو عايزة تعملى نصف المقدار اقسمى المقادير كلها و ممكن تعملى المقدار كامل و تحطيه فى اكياس محكمة فى الفريزر و سخنيه فى المايكروويف

فى وصفة الباباز شكلها تحفففففة ما شاء الله بس بنى ليه؟ إنتى زينتيها بشيكولاته؟

لا هى مفيهاش شيكولاتة بس انا قلبتها فلونها من تحت كان غامق شوية يظهر انى سيبتها فى الفرن زيادة شوية

انتى بتعملى خطوط بالشيكولاتة أشكال حلوة إزاى بقمع و لا بإيه؟

تقدرى تعملى خطوط الشيكولاتة لو عندك كيس التجميل بتاع الكريم شانتيه بيبقى فيه معاه قمع من غير شكل مجرد انه مخروم و لو معندكيش اعملى قرطاس من ورق الخبيز و حطى فيه الشيكولاتة و اعملى بيه

فى وصفة البروفيترول ممكن استبدل الزبده بالزيت ؟

ممكن تحطى بدل الزبدة 7 م ك زيت من الملاعق المكاييل و بالنسبة لمشكلة اللبن عشان الحساسية ممكن مش لازم تحشى الشو خالص او تعملى الكاسترد بعصير البرتقال بدل اللبن و صوص الشيكولاتة برضه استبدلى اللبن بعصير البرتقال و شيلى الزبدة اللى فى مقادير الصوص

































































الرجوع الى أعلى الصفحة اذهب الى الأسفل
وردشان
Admin
avatar

عدد المساهمات : 206
تاريخ التسجيل : 15/05/2011

مُساهمةموضوع: رد: بعض الاسئلة و الاجوبة التى تساعد فى تنفيذ الوصفات   السبت 09 يوليو 2011, 19:23

منونة حبيبتى
عندى سؤالين
الاول وصفة البسكوت عملتها لتالت مرة و برضة مفيش فايدة
العجينة مش متماسكة مع انى التزمت مش عارفة؟؟؟
عندك وصفة تانية او حل؟
السؤال التانى محتاجة وصفة مافن من غير موز
عملت وصفة كيك بتطلع معايا جميلة و صبيتها فى صينية الكب كيك
طلعت قصصصصصة بتتاكل بالمعلقة ههههه
تقدرى تساعدينى؟
بارك الله فيكى
الرجوع الى أعلى الصفحة اذهب الى الأسفل
http://gluten-free.forumegypt.net
manoona
Admin


عدد المساهمات : 217
تاريخ التسجيل : 17/05/2011

مُساهمةموضوع: رد: بعض الاسئلة و الاجوبة التى تساعد فى تنفيذ الوصفات   الأحد 10 يوليو 2011, 16:04




مش عارفة اقولك ايه يا ورد دة انا باعملها علطول و بتبقى مظبوطة Shocked
اما بالنسبة للمافين انا شايفاكى منزلة وصفة كيك شكلها ما شاء الله حلوة حطيها فى قوالب صغيرة تبقى مافين I love you
الرجوع الى أعلى الصفحة اذهب الى الأسفل
وردشان
Admin
avatar

عدد المساهمات : 206
تاريخ التسجيل : 15/05/2011

مُساهمةموضوع: رد: بعض الاسئلة و الاجوبة التى تساعد فى تنفيذ الوصفات   الثلاثاء 12 يوليو 2011, 10:09

إن شاء الله هجرب تانى مش هيئس
إنتى و حور و green
جربتوها و طلعت جميلة ما شاء الله
فأكيد فيه حاجة غلط انا بعملها
الرجوع الى أعلى الصفحة اذهب الى الأسفل
http://gluten-free.forumegypt.net
memo ali



عدد المساهمات : 1
تاريخ التسجيل : 06/12/2011

مُساهمةموضوع: رد: بعض الاسئلة و الاجوبة التى تساعد فى تنفيذ الوصفات   الثلاثاء 06 ديسمبر 2011, 02:19

السلام عليكم
انا عضوه جديده ويشرفنى اكون عضوه فى المنتدى وفكره المنتدى حلوه اوى
انا عاوزه اسال سؤال عن السينابون لو سمحتو
يدخل الفرن درجه حرارته كام والمده اد ايه؟
لانى عملته ونشف من تحت شويه
وكمان لما يستوى اخرجه من الفرن على طول ولا ممكن اسيبه فى الفرن وهو مطفى؟
وشكرا
الرجوع الى أعلى الصفحة اذهب الى الأسفل
وردشان
Admin
avatar

عدد المساهمات : 206
تاريخ التسجيل : 15/05/2011

مُساهمةموضوع: رد: بعض الاسئلة و الاجوبة التى تساعد فى تنفيذ الوصفات   الثلاثاء 06 ديسمبر 2011, 17:50

نورتى المنتدى يا ميمو
سعداء جدا بإنضمامك لينا
إن شاء الله الشيف دينا تقدر تساعدك
الرجوع الى أعلى الصفحة اذهب الى الأسفل
http://gluten-free.forumegypt.net
 
بعض الاسئلة و الاجوبة التى تساعد فى تنفيذ الوصفات
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
خالي من الجلوتين السلياك وحساسية القمح فى مصر Celiac gluten free Egypt :: ملتقى مرضى السيلياك و ذويهم للتعارف و تبادل الخبرات و الإقتراحات :: تبادل الإستفسارات و الخبرات اللازمة لنجاح المعجنات و المخبوزات الخالية من الجلوتين-
انتقل الى: